بادشاہ جب بھی کسی کو وہ خوشی کا پیغام دے کر بھیجتا وہ کسی نہ کسی طرح اُن تک پہنچنے میں مکمل کامیاب نہ ہو پاتا۔ یا تو وہ خبر ادھوری رہ جاتی یا اُس میں ملاوٹ کر دی جاتی۔ اِدھر علیم اور اُس کے بعد اُس کی کئی نسلیں بادشاہ کی جانب سے واپسی کی خبر کا اِنتظار کرتے تھک گئے لیکن اُدھر بادشاہ کئی دہائیوں سے اُسے واپسی کے لئے خوشی کی نوید بھیجتا رہا۔ اُس نے کئی ایک وزیروں اور لوگوں کو بھیجا کہ وہ علیم اور اُس کے گھرانے کے لوگوں تک یہ خبر پہنچائیں کہ بادشاہ نے اُس نا فرمانی کی قیمت ادا کر دی ہے ۔ وہ بگڑتے ہوئے اِس حد تک پہنچ گئے کہ اُنہوں نے بادشاہ کے کئی منادوں کو یا تو نظر انداز کر دیا اور یا پھر اُن کو جھوٹے و غلط جان کر سخت مخالف سے اُنہیں مار ڈالا۔

اِس طرح ایک طرف لوگ خود ساختہ طریقوں سے واپسی کی کوشش کرتے رہے اور دُوسری طرف اصل خبر اُن تک پہنچنے میں مُشکل کا شکار رہی۔ بہت سے لوگوں نے اپنے بل پوتے پر باہر سے داخل ہونے کی کوشش کی لیکن ایسا کرنا بالکل بے کار اور فضول تھا کیوں کہ جب تک اندر سے کوئی آنے کی اِجازت نہ دے تو باہر سے کوئی بھی اپنی مرضی سے داخل نہیں ہو سکتا تھا جبکہ یہ تو صرف بادشاہ کی مرضی اور اُس کے بتائے ہوئے راستے سے ہی ممکن تھا۔

لیکن کوئی بھی بادشاہ کے بتائے ہوئے راستے کو سمجھنے اوراُس پر یقین کرنے کے لئے تیار نہ تھے۔ بادشاہ نے بار ہا کوششیں کیں لیکن کسی نے اُس شاہی فرمان کی کی قدر نہ کی بلکہ وہ ہمیشہ اُسےرَد کرتے رہے ۔چونکہ اُن کے بزرگوں نے کئی دہائیوں سےمحل میں واپسی کے اِس قدر جتن کئے تھے اورقیمتیں ادا کیں تھیں کہ اُن کے لئے اِس قدر آسان اور مفت واپسی کی خبر سُننا عقل ِ کل سے باہر تھا۔ وہ کبھی تصور بھی نہیں کر سکتے تھے کہ جس اُمید کو پانے کے لئے اُنہوں نے اپنی نسلیں تباہ کر دیں اُس کو پانا اِتنا آسان کیسے ہو سکتا ہے کہ محظ بادشاہ کی ادا کردہ قیمت کوقبول کریں، اپنے بزرگ سے ہوئی غلطی کا اور اپنی نافرمانی کا اعتراف کریں اور محل میں واپس چلے جائیں۔ اُن کے سوچ و گمان میں بھی نہ تھا کہ یہ واقع ہی اِتنا آسان اور سستے داموں ہو سکتا ہے۔